Дүние жүзінде медицина қызметкерлерінің қателігінен әр оныншы емделуші зардап шегеді екен. Тіпті дәрігерлердің немқұрайлылығынан пациенттердің қайтыс болу жағдайлары ЖИТС, туберкулез секілді қауіпті жұқпалардан өлім-жітім көрсеткішімен қатар 14-ші орында тұр. 

Әлбетте, мәселенің басты себебі – денсаулық сақтау ұйымдарының сапасында екені мәлім. Сондықтан сарапшылар барлық аурухана мен клиникалар халықаралық стандартқа сай аккредиттеуден өтіп, проб­леманы шешуді қарапайым санитарлық талаптардан бастауды ұсынып отыр.  Денсаулық сақтау министр­лігінің Денсаулық сақтауды дамыту республикалық орталығы ұйымдастырған «Медициналық қызметтердің сапасы, пациент­тердің қауіпсіздігі және аккредиттеу» тақырыбында өткен алқа­лы жиында Дүниежүзілік ден­саулық сақтау ұйымының ар­найы өкілі, доктор Агнес Лео­тсакос әлемде әрбір оныншы па­циентке медициналық қателік жасалатынын айта келіп, мұның басты себебі дәрігерлер немесе медбикелер қарапайым тазалық ережелерін сақтамайтынынан туындайтынын алға тартты. «Әсі­ресе аурухана- ішілік инфек­ция – күллі әлемде өзекті проб­лемаға айналып отыр. Мы­салы, ауруханаларға кө­бі­не шұ­ғыл медициналық көмек­ті қа­жет ететін науқастар жеткі­зі­ле­тіні белгілі. Солардың бір- а­зы­на күрделі оталар жасалып, дәрі­герлер ақ тер, көк тер болып, әлгі пациенттің жанын аман-есен алып қалады. Бі­рақ отаның сәтті өткенінен не пайда, ауруханада жаңағы пациент медбикенің са­лақ­­тығынан, қарапайым таза­лық ­ережесін сақтамағанынан инфекция жұқтырып, қайтыс болып жатады. Мұндай оқиғалар өте жиі кездеседі. Сондықтан медициналық ұйымдардың бар­лығы аккредиттеу талаптарынан өтіп, әлемдік стандартқа сай­ қыз­мет етуі керек», дейді аме­рикалық са­рапшы.

16-17 қараша күндері Астанада «Медициналық қызмет сапасы, пациенттер қауіпсіздігі және аккредиттеу» тақырыбында халықаралық конференция өтуде.

Конференция жұмысына денсаулық сақтау саласының 500-ден аса медицина қызметкерлері мен ұйымдастырушылары, оның ішінде ҚР Денсаулық сақтау министрлігінің, медициналық және ғылыми  ұйымдардың, Дүниежүзілік денсаулық сақтау ұйымы елдік офисінің ресми өкілдері, шетелдік серіктестер қатысуда.

Конференцияны ұйымдастырушы – Денсаулық сақтауды дамыту республикалық орталығы. Пленарлық отырыс барысында  Денсаулық сақтау министрлігінің Қоғамдық денсаулық сақтау комитеті төрағасының орынбасары Б.Ш.Шәріп және Қоғамдық кеңес төрайымы Н.М.Петухова сөз сөйледі.

Н.М.Петухова медициналық қызметтердің ұйымдастырылуы, сапасы және пациенттердің отандық медицинаға деген сенімдерінің азаюы секілді жүйелі шешімді қажет ететін, денсаулық сақтау саласының бірқатар проблемалық мәселелерін алға тартты.

Қазіргі уақытта Қазақстанда бұл мәселелер сапаның сыртқы және ішкі аудиті, сапа стандарттары, медициналық ұйымдарды аккредиттеу жүйелері арқылы шешімін табуда.  Сапалы және дұрыс медициналық қызмет көрсетуге жұмылдырылған, емдеу хаттамаларын бекітетін Медициналық қызметтер сапасы жөніндегі біріккен комиссия жұмыс істейді.

Ағымдағы жылдың 10-14 шілдесі аралығында SIDCER/FERCAP тану (халықаралық стандарттарға сәйкестік үшін этикалық комиссиялар қызметінің аудит бағдарламасы) бағдарламасы аясында Оңтүстік-Шығыс Азия елдерінің Этикалық комитеттер форумының халықаралық сарапшылары елімізде болып, осы келген сапарларында ҚР ДСМ Этика мәселелері жөніндегі орталық комиссиясы үшін тренинг және халықаралық аудит өткізді.   

Профессорлар Christina Torres (Филиппины),  Juntra Karbwang (Нагасаки Университеті, Жапония), Aphornpirom Ketupanya (Таиланд) және Бахыт Сарымсақова (Қазақстан) өткізген тренинг барысында  Комиссия мүшелері, сондай-ақ шақырылған сарапшылар мен ДСДРО қызметкерлері халықаралық құжаттармен, зерттеулер этикасының қағидаттарымен және адамдардың қатысуымен зерттеулер жүргізудің негізгі этикалық талаптарымен таныстырылды. Сондай-ақ, сарапшылар осы саладағы ұлттық заңнамалық актілермен және ҚР ДСМ Этика мәселелері жөніндегі орталық комиссиясының  қызметі туралы есеппен танысты.

Тренингтен кейін халықаралық сарапшылар Комиссия қызметінің Дүниежүзілік Денсаулық сақтау ұйымының этикалық комиисияларына арналған стандарттарына, Үйлесімділік (ICH-GCP) жөніндегі халықаралық конференцияның тиісті клиникалық практикасының стандарттарына, Комиссияның өзінің стандарттық операциялық рәсімдеріне және биомедициналық зерттеулер этикасы саласындағы ұлттық заңнамаларға сәйкестігіне бағалау – аудит өткізді. Бағалау нәтижелерін сарапшылар Комиссия мүшелерімен бірге Комиссия қызметінің жақсы жақтары мен одан әрі жақсарта түсу жөнінде ұсынымдар айтылған қорытынды жиында талқылады.