ДСДРО АҚШ мейіргерлерінің мемлекеттік кеңестері ұлттық комитетімен байланыс орнатуда
27-30 қарашада ДСДРО өкілдері жұмыс сапарымен Америка Құрама Штаттары мейіргерлерінің мемлекеттік кеңестері ұлттық комитетінің (NCSBN) шақыруымен Чикагода болды.
NCSBN – үкіметтік емес ұйым, ұйым арқылы АҚШ халқының денсаулығын қорғап қана қоймай, мейіргерлерге арналған ұлттық лицензияланған емтихан (NCLEX) өткізуді қамтамасыз етеді, нәтижелері АҚШ-та ғана емес, Канада аумағында да мойындалады.
NCSBN барудағы мақсат – Қазақстанда денсаулық сақтау мамандарын сертификаттау жүйесін медициналық қызметті лицензиялау жүйесіне ауыстыру үшін орта медицина қызметкерлерін лицензиялау және сертификаттаудың халықаралық тәжірибелерімен танысу.
Сапар аясында ДСДРО бас директоры Айнұр Айыпханова NCSBN-мен орта медицина қызметкерлерінің медициналық қызметтерін реттеу, медициналық білімдерін жетілдіру және лицензиялау саласында ынтымақтастық туралы меморандумға қол қойды.
ДСДРО өкілдері емтихан материалдарын әзірлеу, лицензиялық емтиханнан өту баллын белгілеу және психометриялық талдау жасау арқылы нәтижелерді есептеу тәжірибелерімен танысты. Сондай-ақ, медициналық реттеуде және лицензиялауда ақпараттық технологияларды пайдалану мәселелері талқыланды.
Емделуші құлықсыз ба, дәрігер біліксіз бе?
Дүние жүзінде медицина қызметкерлерінің қателігінен әр оныншы емделуші зардап шегеді екен. Тіпті дәрігерлердің немқұрайлылығынан пациенттердің қайтыс болу жағдайлары ЖИТС, туберкулез секілді қауіпті жұқпалардан өлім-жітім көрсеткішімен қатар 14-ші орында тұр.
Әлбетте, мәселенің басты себебі – денсаулық сақтау ұйымдарының сапасында екені мәлім. Сондықтан сарапшылар барлық аурухана мен клиникалар халықаралық стандартқа сай аккредиттеуден өтіп, проблеманы шешуді қарапайым санитарлық талаптардан бастауды ұсынып отыр. Денсаулық сақтау министрлігінің Денсаулық сақтауды дамыту республикалық орталығы ұйымдастырған «Медициналық қызметтердің сапасы, пациенттердің қауіпсіздігі және аккредиттеу» тақырыбында өткен алқалы жиында Дүниежүзілік денсаулық сақтау ұйымының арнайы өкілі, доктор Агнес Леотсакос әлемде әрбір оныншы пациентке медициналық қателік жасалатынын айта келіп, мұның басты себебі дәрігерлер немесе медбикелер қарапайым тазалық ережелерін сақтамайтынынан туындайтынын алға тартты. «Әсіресе аурухана- ішілік инфекция – күллі әлемде өзекті проблемаға айналып отыр. Мысалы, ауруханаларға көбіне шұғыл медициналық көмекті қажет ететін науқастар жеткізілетіні белгілі. Солардың бір- азына күрделі оталар жасалып, дәрігерлер ақ тер, көк тер болып, әлгі пациенттің жанын аман-есен алып қалады. Бірақ отаның сәтті өткенінен не пайда, ауруханада жаңағы пациент медбикенің салақтығынан, қарапайым тазалық ережесін сақтамағанынан инфекция жұқтырып, қайтыс болып жатады. Мұндай оқиғалар өте жиі кездеседі. Сондықтан медициналық ұйымдардың барлығы аккредиттеу талаптарынан өтіп, әлемдік стандартқа сай қызмет етуі керек», дейді америкалық сарапшы.
Елордада медициналық қызмет сапасын арттыруға арналған халықаралық конференция басталды
|
Үздік тәжірибелер талқыланды
16-17 қараша күндері Астанада «Медициналық қызмет сапасы, пациенттер қауіпсіздігі және аккредиттеу» тақырыбында халықаралық конференция өтуде.
Конференция жұмысына денсаулық сақтау саласының 500-ден аса медицина қызметкерлері мен ұйымдастырушылары, оның ішінде ҚР Денсаулық сақтау министрлігінің, медициналық және ғылыми ұйымдардың, Дүниежүзілік денсаулық сақтау ұйымы елдік офисінің ресми өкілдері, шетелдік серіктестер қатысуда.
Конференцияны ұйымдастырушы – Денсаулық сақтауды дамыту республикалық орталығы. Пленарлық отырыс барысында Денсаулық сақтау министрлігінің Қоғамдық денсаулық сақтау комитеті төрағасының орынбасары Б.Ш.Шәріп және Қоғамдық кеңес төрайымы Н.М.Петухова сөз сөйледі.
Н.М.Петухова медициналық қызметтердің ұйымдастырылуы, сапасы және пациенттердің отандық медицинаға деген сенімдерінің азаюы секілді жүйелі шешімді қажет ететін, денсаулық сақтау саласының бірқатар проблемалық мәселелерін алға тартты.
Қазіргі уақытта Қазақстанда бұл мәселелер сапаның сыртқы және ішкі аудиті, сапа стандарттары, медициналық ұйымдарды аккредиттеу жүйелері арқылы шешімін табуда. Сапалы және дұрыс медициналық қызмет көрсетуге жұмылдырылған, емдеу хаттамаларын бекітетін Медициналық қызметтер сапасы жөніндегі біріккен комиссия жұмыс істейді.