Өкінішке орай, бүгінгі таңда дұрыс тамақтану принциптерін қатаң ұстану оңай емес: асығып жолай фаст-фуд жейміз, спортпен айналысуға да әрдайым уақыт табыла бермейді.
Дегенмен, салауатты өмір салтын ұстану, оның ішінде дұрыс тамақтануға назар аудару маңызды. Сонымен, дұрыс тамақтанудың басты қағидалары қандай?
ТАҢҒЫ АС ІШУДІ ҰМЫТПАҢЫЗ
Таңғы ас - адам бойындағы күш-қуат пен жұмыс істеу қабілетінің артып, көңіл күйдің қалыпты болуына оң әсер етеді. Сондықтан таңғы асты ішіп жүруді әдетке айналдыру керек.
ҚАРНЫҢЫЗ АШҚАН КЕЗДЕ ҒАНА ТАМАҚТАНЫҢЫЗ
Тәбет болғанда ғана тамақтанған дұрыс. Тамақ ішпес бұрын Өзіңізге «Шынымен қарным ашып тұр ма?» деген сұрақ қойыңыз. Қарныңыз тойып немесе асқа зауқыңыз соқпаса ас ішуге отырмаған жөн. Бұл Сізге қосымша калория мен артық тамақ ішуден аулақ болуға көмектеседі.
ҰЙЫҚТАР АЛДЫНДА ТАМАҚ ІШПЕҢІЗ
Кешкі ас ішуді ұйықтар алдында 1-1,5 сағат бұрын жоспарлаған дұрыс. Ұйқы кезінде ас баяу қорытылады, сондықтан ұйықтар алдында тойып тамақтанбау керек.
ЖЕМІС ПЕН КӨКӨНІС ПАЙДАЛЫ
Көкөніс пен жемістерді күнделікті пайдалану ағзадағы холестерин деңгейін төмендетіп, қан қысымын қалыпты нормада ұстап, қан айналым жүйелерін ретке келтіреді. Иммундық жүйені жақсартуға ықпал етеді.
СУДЫ КӨБІРЕК ІШІҢІЗ
Күнделікті кем дегенде 2 литр су ішу қажет. Себебі, суды жеткілікті мөлшерде пайдаланған кезде ағзадан тұздар мен токсиндер шығарылады.
ҚАНТ ҚАБЫЛДАУДЫ АЗАЙТЫҢЫЗ
Қанты ботқа, шайға, кофеге аз көлемде қосыңыз. Құрамында қанты көп тағамдардан аулақ болыңыз: ол кетчуп және тұздықтар. Бұл денсаулықты сақтауға және қандағы қант деңгейін қалыпты сақтап тұруға көмектеседі.
СМАРТФОНСЫЗ ТАМАҚТАНУ
Ас қабылдағанда бөгде заттарға көңіл аудармаңыз. Әсіресе, смартфон немесе теледидар қарау дұрыс емес, ойды тамаққа аударыңыз. Сонда тәбетіңіз ашылып, тамақ сіңімді болады.
БЕЛСЕНДІ БОЛЫҢЫЗ – КӨБІРЕК ҚОЗҒАЛЫҢЫЗ
Қалыпты метаболизмді және денсаулықты сақтау үшін жиірек қимылдаңыз. Әсіресе, теледиар, ұялы телефон қарап ұзақ отыру зиян.