Әр үйде дәрі-дәрмек қоры бар дәріқұты болады. Оны көбінесе, дәрі-дәрмекті сақтауға қойылатын талаптар жайлы ойланбастан, қолайлы жерде сақтайды. Есіңізде болсын, сақтау шарттары бүкіл жарамдылық мерзімінде дәрінің емдік қасиеттерінің сақталуын қамтамасыз ететіндей болуы тиіс. Сақтау шарттарын орындамасаңыз дәрінің тиімділігі жойылады, тіпті бұл өміріңізге қауіп төндіреді. Ол үшін, алдымен дәрілік заттарды сақтаудың қарапайым ережелерін білу қажет.
Дәріні қайда сақтау керек
Дәріні сатып алған соң, сақтау шарттары тұрғысында нұсқаулықты мұқият оқып шығыңыз. Дәрілік заттар құрғақ, салқын, жарықтан қорғалған жерде, жылытқыш және қыздырғыш аспаптардан аулақ жерде сақталуы тиіс. Әдетте ауасы ыстық, тамақ әзірлейтін ас бөлмесінде, тым көп ылғалды жуынатын бөлмеде, тікелей күн сәулесінің әсеріне ұшырайтындықтан, терезенің алдында мүлдем сақтауға болмайды.
Егер балаңызға балаларға арналған жағымды иісі бар дәрі-дәрмектер беретін болсаңыз, оның басқа дәрілермен байланысуына жол бермеңіз, үйіңіздегі дәріқұты және оның ішіндегісі баланың назарын аудармағаны дұрыс. Дәріқұтыны баланың көзінше ашпаңыз, ондағы заттарды, тіпті зиянсыз түрлерін де ойнауға бермеңіз.
Дәріқұтыны сөреге жоғары қарай немесе кіреберістегі бекітілетін шкафқа, қоймаға немесе жеке бөлмеге қойған дұрыс.
Дәріқұтының қыздырғыш аспаптардан аулақ болуын қадағалаңыз. Тану материалдарына да – бинт, дәке, майлықтарға да солай ету керек. Жуынатын бөлмеде, ас бөлмесінде шұңғылшаның төңірегі, балкон дәріқұтыға орын емес. Сонымен қатар, таблеткалар, капсулалар, өсімдік шикізаты және ұнтақтар ылғалды оңай сіңіреді, бұл олардың емдік қасиеттерінің өзгеруіне әкеледі. Дәрі-дәрмектерді құрғақ жерде сақтаңыз.
Дәріні неде сақтау керек
Ең дұрысы үйреншікті пластмасса, металл қораптарда (дәрілерге арналған зауыттық контейнерде) немесе таза картон қорапта сақтау керек. Дәріні қолдану жөніндегі нұсқаулығымен бірге зауыттық қаптамаларда сақтаған дұрыс, және барлық дәрілік заттарда заттаңбаларының болуын ұмытпаңыз. Флакондардағы дәрілерді тығыз жабылған күйінде сақтайды, себебі ашық күйінде кейбір дәрі-дәрмектер буланып, ылғал сіңіріп, ұшпа заттарды бөле алады, немесе ауамен әрекеттесіп кете алады.
Дәріні қалай сақтау керек
Дәрілік затты сатып алғаннан кейін, бәрінен бұрын, оны сақтау шарттарына көңіл аудару қажет. Бұл деректер әдетте дәріні қолдану жөніндегі нұсқаулықта және сыртқы қаптамада көрсетіледі. Бұл ретте нұқсаулықта сақтау ерекшеліктері мен температуралық тәртіп шегі көрсетілсе, түсінікті болады. Алайда дәрі-дәрмектердің көбінде мыналар көрсетіледі: «Бөлме температурасында сақтаңыз», «Салқын, жарықтан қорғалған жерде сақтаңыз», «Құрғақ, жарықтан қорғалған жерде сақтаңыз» және т.б.
Мынаны біліңіз:
- егер қолдану жөніндегі нұсқаулықта бөлме температурасында сақтауға кеңес берілсе немесе температура көрсетілмесе, онда бұл дәрі-дәрмекті +15°-тен +25°С-ке дейінгі температурада сақтау керек дегенді білдіреді;
- егер салқын жерде сақтауға кеңес берілсе, онда бұл дәрі-дәрмекті +°-тен +5°С-ке дейінгі температурада сақтау керек дегенді білдіреді;
- қараңғы жерде сақтау дәрілік затты күн сәулесінен қорғалған жерде сақтау керек дегенді білдіреді;
- құрғақ жерде сақтау дәрілік затты салыстырмалы ылғалдылығы 60 пайыздан аспайтын жерде сақтау керек дегенді білдіреді;
Қаптамада көрсетілген жарамдылық мерзімі мөрленген дәрі-дәрмектерге қатысты. Оның тұтастығын бұзған соң, әр дәрілік зат үшін жаңа уақыт есебі басталады. Ашқаннан кейін, мынадай межелдемелерге үйреніңіз:
- таблеткалар, капсулалар қасиетін 1 жыл бойы сақтайды;
- тубадағы жақпамайлар – жарты жыл, банкідегі жақпамайлар – 3 ай;
- сыртқа қолдануға арналған сұйықтықтар – 6 ай, ішке қабылдауға арналған сұйықтықтар (жөтелге қарсы шәрбат) – 3 ай;
- көзге және құлаққа арналған тапшыларды 3-4 аптадан артық сақтамайды;
- шприцтер, бинт және өзге де тану материалдарының өз сақтау мерзімі бар екенін ұмытпаған жөн (уақыт өте келе қаптама өз саңылаусыздығын жойып, бұйым зарарсыздандырылмаған болады).
Әркез дәрі-дәрмекті ашқан күніңізді блокнотқа немесе қораптың өзіне жазып жүріңіз. Бұл өзіңізді және отбасы мүшелерін бұзылған сұйық дәрі және жөтел дәрісін қолдану қауіп-қатерінен сақтайды.
Егер Сіз таблетаканың қатпарланғанын, түсінің өзгергенін байқасаңыз немесе тұнбада қышқыл иіс пайда болса, немесе ерітіндіде тұнба түзілсе, онда физикалық қасиеттердің немесе сипатының ықтимал ауытқуларын сипаттайтын дәрі-дәрмекке арналған нұсқаулыққа қараңыз. Кейбір сұйық дәрілер үшін шамалы тұнбаның түзілуіне жол беріледі, бұл оның қасиеттеріне еш әсер етпейді.
Резеңке бұйымдардың жарамсыздық белгісі үстінің жабысқақтығы, жұмсаруы және пішінін өзгертуі болып табылады. Мұндай бұйымдарды лақтырып тастау қажет.
Есіңізде болсын, дәрілік заттарды сақтау жөніндегі аталған кеңестерді сақтай отырып, өзіңізді және жақындарыңызды уланудан және өзге де күтпеген жағдайдан сақтай аласыз. Өздеріңізді күтіңіздер!
Дәрілік заттарды қолдану жөнінде сұрақтарыңыз туындаған жағдайда 8 800 080 88 87 Call-қызмет телефонына тегін қоңырау шалыңыз.
*ҚР ДСМ «Денсаулық сақтауды дамыту республикалық орталығы» ШЖҚ РМК Дәрілік заттарды ұтымды пайдалану орталығы