2017 жылдың 13 шілдесінде Қазақстан Республикасының Денсаулық сақтау министрлігі Денсаулық сақтауды дамыту республикалық орталығымен (ДСДРО) бірлесіп, «Қазақстан Республикасының Денсаулық сақтау министрлігіне түскен азаматтардың өтініштерін талдау» тақырыбында селекторлық жиын өткізді.
Жиынға аймақтардағы денсаулық сақтау басқармаларының басшылары, денсаулық сақтау ұйымдарының бас дәрігерлері мен олардың медициналық қызмет сапасы жөніндегі орынбасарлары, денсаулық сақтау ұйымдарының пациентті қолдау және ішкі бақылау қызметтері бөлімдерінің мамандары қатысты.
Селекторлық жиын барысында Денсаулық сақтау министрлігіне, Қоғамдық денсаулық сақтау комитеті мен аумақтық департаменттерге осы жылдың 6 айы ішінде түскен азаматтар өтініштерінің талдаулары, аймақтық Call-орталықтар қызметінің қорытындылары тыңдалды.
ҚР Денсаулық сақтау вице-министрі Ләзат Ақтаева өз сөзінде еліміз азаматтарының көпшілігі өздері тұратын аймақтарында-ақ шешімі табылатын медициналық көмек көрсету жөніндегі мәселелер бойынша мемлекеттік органдарға жүгінуге мәжбүр болатындықтан, аталған мәселелердің өзектілігін атап өтті.
ҚР ДСМ Қоғамдық денсаулық сақтау комитетінің медициналық қызмет сапасын бақылау басқармасының басшысы Әлия Рахымжанова 6 айда түскен медициналық қызмет сапасына шағымданған 212 іс құқық қорғау органдарына жіберілгендігі туралы деректер келтірді.
ҚР ДСМ Медициналық көмекті ұйымдастыру департаменті директорының орынбасары Айгүл Тастанова 6 айда орталық мемлекеттік органдарға 2106 өтініш түскендігінен хабардар етті.
ДСДРО бас директоры Айнұр Айыпханова ел азаматтары медициналық қызметтер туралы ақпарат алып, сонымен бірге шағым бере алатын аймақтық Call-орталықтардың қызметтеріне тоқталды. Бірінші жартыжылдықта Call-орталықтарға 266 мың өтініш түскен, олардың 98%-ы ақпарат алу сипатындағы қоңыраулар, шалынған қоңыраулардың 2%-ы ғана шағымдар.
Тұрғындармен кері байланыс қалыптастырудың қоғамдық маңызын ескере отырып, азаматтардың өтініштерімен жүйелі жұмыс істеу үлгісі ұсынылды. Оны жүзеге асыру барысында, мәселелерді «осында және қазір» қағидаты бойынша шешуде денсаулық сақтау ұйымдарындағы пациенттерді қолдау қызметтерімен және Call-орталықтармен өзара қарым-қатынасты арттыру шаралары қарастырылатын болады.
Бұдан басқа, сайттар және әлеуметтік желілер арқылы аймақтардағы тұрғындармен белсенді кері байланыс қамтамасыз етілмек.
